July 2004
De Protestantse Kerk in Nederland

Dreech
Nei jierren fan oerlis en praten is it der by eintsjebeslút dochs fan kommen: mei yngong fan 1 maaie 2004 binne de ‘Nederlandse Hervormde Kerk’, ‘De Gereformeerde Kerken in Nederland’ en ‘De Evangelisch-Lutherse Kerk in het Koninkrijk der Nederlanden’ fusearre ta ien tsjerke, de ‘Protestantse Kerk in Nederland ‘ (PKN).

Wy hawwe yn de kranten lêze kinnen, hoe dreech it west hat om safier te kommen. Breklinen dy’t yn it
ferline ûntstien binne, kin men net samar wer ûngedien meitsje. En ferskillende tradysjes en organisaasjes binne net samar wer byelkoar te bringen. Mar benammen yn de lêste jierren is der datoangeande wol in hiel soad feroare.
Geandewei waarden de skiedings út it ferline net langer sa field. En dêrmei wiene se yn wêzen efterhelle.
Dat wol net sizze dat alle grifformearden en herfoarmen al safier binne. Der binne in stikmannich pleatslike grifformearde tsjerken dy’t net meigeane yn de PKN, op oare plakken binne it groepen herfoarmen dy’t net
oer te kommen beswieren sjogge.

De fúzje wol sizze, dat de trije tsjerken administratyf en juridysk no opgien binne yn ien tsjerkegenoatskip.
Sa is der no ien synoade, ien tsjerke-oarder, deselde regleminten, deselde teologyske oplieding, deselde traktemints- en pensioenregeling ensfh. Op pleatslik nivo lykwols is alles by it âlde litten: gemeenten meie
har noch rêstich ‘herfoarme’, ‘grifformeard’of ‘luthersk’ neame (mei in eigen administraasje, eigen besittings
en gebouwen en eigen foargongers), mar dan wol yn it ferbân fan de nije PKN.  

Yn Earnewâld feroaret net folle
In pleatslike protestantske gemeente kin ûntstean troch it fusearjen fan twa of mear pleatslike gemeenten: herfoarme, grifformeard of luthersk.
Hjir yn Fryslân sil it dêrby almeast gean om de fúzje fan in herfoarme gemeente en in grifformearde tsjerke. Benammen yn dy gemeenten dêr’t al in Meielkoar-op-wei-proses geande wie, leit it foar de hân om sa gau mooglik de gemeente om te dopen yn in ‘Protstantske gemeente’. Datselde kin ek yn dy plakken dêr’t allinne mar in herfoarme gemeente bestiet.
Yn Earnewâld leit it der lykwols wat oars hinne. Wy hawwe yn ús lêste mienskiplike tsjerkeriedsgearkomst dan ek besletten om de âlde oantsjuttings herfoarme en grifformeard ynearsten noch mar oan te hâlden.  

In pear dingen binne mei yngong fan 1 maaie al feroare: de tsjerkfâden hjitte no offisjeel tsjerkerintmasters
(oft in tsjerkfâdij dêrmei dan no in tsjerkerintmasterij wurden is, dat wit ik net). Nij is ek dat dizze tsjerkerintmasters gjin hannelingen dwaan kinne bûten de oare tsjerkeriedsleden om. Sa moatte offisjele stikken no ek tekene te wurden troch de foarsitter en de skriuwer fan de tsjerkeried.